To što je danas sve manje lijepih manira, gestova, razlog je za Milicu Milačič da se bori da ljubaznost i osmijeh budu (opstanu) glavni "akteri" u međuljudskim odnosima, najprije kod najmlađih.

“Djeci treba ljubav, jer na osnovu pokazane ljubavi oni zaključuju da su vrijedna ljudska bića, ali im treba i disciplinovanje, pošto misle da je sve prijatno istovremeno i korisno. I ta kombinacija je pobjednička, jer je rezultat vaspitanja dijete sa izgrađenom pozitivnom predstavom o sebi, izgrađenim navikama i samodisciplinom”, smatra Milačić.

O neprolaznim vrijednostima kakve su: pristojnost, odmjereno i kulturo ponašanje razgovarali smo sa učiteljicom bontona 10.03.2022.

***

Sa svega 19 godina Milica Milačić počela je da doprinosi da naše društvo bude bolje, i to polazaći od osnove  kakva je kultura, odnosno lijepo ponašanje.

Milačič koja je učiteljica bontona osnovala je NVO “Dama”, kojoj je glavni cilj afirmacija i pomoć u vaspitanju djece, vodeći se neprolaznim vrijednostima -  pristojnost, odmjereno i kulturo ponašanje.

Naša sagovornica priznaje da je brine to što maniri više nijesu na cijeni i što smo, kako kaže, dopustili da počnu da izumiru u međuljudskim odnosima.

“Maniri se uče od rođenja i vremenom prelaze u šablon, odnosno mi ih usvajamo kao normalne stvari koje svakodnevno treba da radimo. Ako kažemo da neka osoba ima lijepe manire, to znači da se ona lijepo ponaša u svim situacijama i lijepo ophodi prema drugim ljudima.

Jasno je da ne samo da je poželjno imati lijepe manire, već to postaje nešto što bi svaki čovjek morao da ima, pogotovo ako se uzme u obzir činjenica da smo svi mi smo svakodnevno u kontatku sa ljudima i isključivo od nas zavisi šta će drugi ljudi misliti i kako će se prema nama ponašati”, kaže Milačić.

Na pitanje da li postajemo društvo u kojem neljubaznost i nekultura više nijesu nikakvo iznenađenje, a lijepi gestovi, nažalost, bivaju upravo to - iznenađenje, Milačić odgovara:

“Postali smo, ali isto tako mislim da nijesmo zakasnili da prominimo tu ružnu naviku, prije svega ako krenemo sami od sebe. Nevaspitano ponašanje je ono koje je dominantno u našem društvu, u svakodnevnim situacijama i međuljudskim odnosima. Lično nezadovoljstvo, iskazujemo vrijeđanjem i nepoštovanjem drugih, pa čak i prirode”, ocjenjuje Milačić.

Tako smo na mnoge lijepe gestove zaboravili, konstatuje naša sagovornica i dodaje da su ljubaznost i osmijeh glavni "akteri" koji nedostaju u međuljudskim odnosima, u 21.vijeku.

 Milica Milačić; Foto: Privatna arhiva

Kakve generacije stastavaju- one kojima su lijepi maniri poznanica ili pak nepoznanica?

“Djeca nemaju urođene manire. Pristojnost je nešto što treba da nauče. Lijepom ponašanju ne mogu se naučiti samo u školi, roditelji u dobrom ponašanju igraju ključnu ulogu. Zasigurno najbolji način da roditelji nauče dijete pristojnosti jeste da budu i sami pristojni”, poručuje naša sagovornica.

Moderno doba, neizostavno i tehnologija uticalo je generalno na crnogorsko društvo u dijelu lijepog ponašanja, mišljenja je Milica Milačić.

“Ne treba dozvoliti da tehnologija odgovara umjesto roditelja na pitanja djeteta”, poručuje Milačić i ističe kako roditelji često zanemare takva upozorenja:

“Neosporno je da je savremena tehnologija prožela svaku poru modernog društva. Ljudi svih generacija oslanjaju se na nju za obavljanje poslovnih i svakodnevnih obaveza, za druženje i igru. Ovo posljednje najviše je osjetno među mlađim generacijama čije su igračke i vrlo često školski pribor zamijenjeni računarima, tabletima, telefonima i aplikacijama”, kaže Milačić.

Nesporno, vremena se mijenjaju, tehnologija napreduje, ali neke stvari poput pristojnosti uvijek imaju istu vrijednost.

“Iako se naravno i tu mijenjaju neka pravila, osnove su uvijek iste. Djeca mogu biti rođena s raznim sposobnostima i talentima, ali pristojno ponašanje nije jedno od njih. Tako da je lijep odgoj nešto što roditelji treba da nauče svoju djecu.

Pravila ponašanja naučena u ranom djetinjstvu dijete će zapamtiti za cijeli život, a to će mu, bez sumnje, dobro doći u svim životnim situacijama, čak i u odrasloj dobi”, smatra Milačić.

 Milica Milačić; Foto: Privatna arhiva

Naša sagovornica ističe kako je teže odraslima objasniti šta je nekulturno ponašanje nego djeci.

“Definitivno odraslima. Svaka odrasla osoba u sebi nosi potencijal za promjenu. Većina odraslih ljudi ima sposobnost rasta i razvoja, pa tako i mogućnost emocionalnoga dozrijevanja. No, da bi promjena mogla nastupiti, osoba mora imati potrebu za promjenom, i što je najvažnije mora biti sprema za promjenu. Dok kada su u pitanju djeca, vjerujem da je najbitniji pristup, a kod njih želja postoji. Kada djeci predočite kako izgleda ružno ponašanje i šta dobijaju time, zasigurno shvate da to nije ponašanje kakvo žele i sami osjete potrebu i benefite lijepog ponašanja”, tvrdi naša sagovornica.

A koje su se metode u učenju lijepih manira kod djece pokazale kao najefikasnije?

“Djeci treba ljubav, jer na osnovu pokazane ljubavi oni zaključuju da su vrijedna ljudska bića, ali im treba i disciplinovanje, pošto misle da je sve prijatno istovremeno i korisno. I ta kombinacija je pobjednička, jer je rezultat vaspitanja dijete sa izgrađenom pozitivnom predstavom o sebi, izgrađenim navikama i samodisciplinom”, navodi Milačić koja nema dilemu- neophodno je uvesti obavezni predmet u školama koji bi se bavio lijepim manirima.

“Osnovni razlog nastanka problema u školskom uzrastu, posebno kada je u pitanju vršnjačko nasilje koje je rasprostranjenije nego ikad, jeste nedostatak osnovnog vaspitanja.

Voljela bih i zalagaću se da lijepi maniri budu obavezan predmet osnovnog obrazovanja, a isto tako, voljela bih da me podrže svi koji dijele moje mišljenje, borimo se za zdravu omladinu i za naše zdravo društvo”, kaže Milačić.

Za kraj, kako motivisati ljude da budu što ljubazniji u čini se, sve “hladnijem” društvu?

 “Miris zauvijek ostaje na ruci onoga ko vam je ružu pružio”, odgovara zagonetno sagovornica portala Dnevno.