Sirup od maslačka ima sličan ukus kao tradicionalni med i lako može da se uklopi u vašu ishranu.

Maslačak je biljka koja prekriva livade i travnjake u proljeće. Dugo se vremena smatrao beskorisnim korovom, ali danas znamo da u sebi sadrži mnogo korisnih jedinjenja koji blagotvorno djeluju na naš organizam.

Med od maslačka nije proizvod pčela, već sirup koji se priprema od cvjetova, vode i šećera. Konzistencija mu je rjeđa od većine vrsta pravog meda, ali je izgledom i bojom sličan pčelinjem medu.

Ima iznenađujuće sličan ukus kao tradicionalni med, pa se lako može uklopiti u vašu ishranu. Izvrsna je zamjena za med za vegane ili za one koji su alergični na pčelinji med.

Odličan je dodatak tostu, kolačima, palačinkama i može se koristiti na isti način kao i pčelinji med, u čaju i drugim napitcima.

Branje maslačka

Branje maslačka je relativno jednostavan proces. Cvjetovi se beru tokom aprila i maja na livadama udaljenim od saobraćajnica.

Toplo, sunčano i suvo vrijeme idealno je za berbu cvjetova. Preporučuje se da ih upotrebite ih odmah nakon berbe jer će se tako najbolje sačuvati njihova ljekovita svojstva.

Priprema

Za pripremu ovog slatkog sirupa biće vam potrebni cvjetovi maslačka, voda, šećer, limun, posuda za kuvanje, drvena kutlača za miješanje, cedaljka i gaza za cjeđivanje.

Prvo dobro operite cvjetove maslačka i odstranite im zelene djelove, ostavljajući samo žute latice. Uklanjanje zelenih djelova koji drže latice nije nužno, ali se preporučuje jer mogu da imaju gorak i neželjen ukus, piše Index.hr.

Zatim stavite latice maslačka u veliku posudu i prelijte kipućom vodom, pa ostavite da se natapaju preko noći. Sjutradan procijedite tečnost kroz cjediljku i gazu, pa u nju dodajte šećer i limun isječen na kriške. Zagrijejte smjesu na umjerenoj temperaturi, povremeno miješajući dok se šećer potpuno ne otopi.

Smanjite temperaturu i kuvajte smjesu oko jedan sat, povremeno miješajući, dok se ne zgusne i dobije konzistenciju meda. Kada se sirup ohladi, stavite ga u staklene tegle i čuvajte na suvom i hladnom mjestu.