Direktor Kliničkog centra Srbije dr Milika Ašanin rekao je da je sedam osoba, dovezenih iz Smedereva i Mladenovca, operisano, od kojih je troje razbuđeno i ekstubirano.

„Primili smo devet osoba, sedam je operisano. Mogu da kažem dobre vijesti, od sedam operisanih troje je razbuđeno, ekstubirano i sasvim su stabilno i dobro. To su pacijentkinja 2003. godište, koja je imala tešku povredu desne noge i lijeve podlaktice, nju su operisali ortopedi, pacijent 2006. koji je imao težak prelom desne noge i tešku povredu arterije, operisali su ga ortopedi i vaskularni hirurzi i jedan pacijent koji je imao tešku povredu urogenitalne regije. Oni su dobro i svjesni su i stabilni“, rekao je Ašanin.

Na pitanje da li su neki pacijenti iz Mladenovca i Smedereva ugroženi, Ašanin je rekao da je dvoje posebno kritično.

„Pacijentkinja koja ima tešku povredu glave i lijevog oka i druga koja ima tešku povredu stomaka, jetre, duodenuma. Situacija se prati iz trenutka u trenutak, radimo dodatna snimanja, imamo određene protokole koje pratimo“, dodao je.

Podsjetimo, samo dan nakon masovnog ubistva u osnovnoj školi u Beogradu, sinoć se dogodilo još jedno. Napadač U. B. je pucao u selu Dubona, gdje je ubio mladog policajca i njegovu sestru, a pucao je i u Malom Orašju i selu Šepšin kod Mladenovca. Stradalo je osam osoba, a 14 je ranjeno.

Prema dosadašnjim podacima, najmlađa žrtva je dijete staro 15 godina.

Opširnije o tome možete čitati OVDJE.